Эрчим хүчний сайд “ДБЭХС” ТӨХК-ийн өвөлжилтийн бэлтгэл ажилтай танилцлаа
УИХ-ын гишүүн, Засгийн газрын гишүүн, Эрчим хүчний сайд Ц.Даваасүрэн, УИХ-ын гишүүн Х.Болорчулуун нар “ДБЭХС” ТӨХК-д 2017 оны 12 дугаар сарын 08 ны өдөр компанийн үйл ажиллагаа болон өвөлжилтийн бэлтгэл ажилтай танилцлаа.
Компанийн 2017-2018 оны өвөлжилтийн бэлтгэл ажлыг хангах хүрээнд Техник зохион байгуулалтын арга хэмжээ, хөрөнгө оруулалт, их засваруудыг 100 хувь хийж гүйцэтгэсэн. Мөн үйлдвэрлэлийн Техник эдийн засгийн үзүүлэлтийн төлөвлөгөөг давуулан биелүүлсэн, санхүүгийн баланс ашигтай ажиллаж байгаа зэрэг төлөвлөсөн ажлуудаа сайн хийж гүйцэтгэсэн байна гэж дүгнэлээ.
36 МВт-ын хүчин чадалтай “ДБЭХС” ТӨХК өнөөдрийн байдлаар хүчин чадлаа бүрэн ашиглаж, цаашид бүс нутгийн цахилгаан эрчим хүчний өсөлтийг хангах боломжгүй байна. Өмнөх Засгийн газрын үед станцын хүчин чадлыг 50 МВт-аар өргөтгөх тендер зарлагдсан ч санхүүгийн гэрээ хэлцэл хийгдээгүй.
Монгол улс ОУВС-ийн хөтөлбөрт хамрагдсантай холбоотойгоор концессын ажлыг зогсоосон байна.
Эрчим хүчний сайд Ц.Даваасүрэн ажлаа хүлээн аваад удаагүй байгаа шинэ Засгийн газар, Эрчим хүчний яам “ДБЭХС” ТӨХК-ийн өргөтгөлийн тендерийг дахин шинээр зарлах болсон талаар мэдэгдлээ. Тэрээр станцын өргөтгөлийн санхүүжилтийг өөр эх үүсвэрээр шийдэхэд онцгой анхаарал хандуулж байгаагаа илэрхийлсэн юм.
