“ДБЭХС” ТӨХК нь Эрчим хүчний салбарын нээлттэй өдөрлөг-2019 арга хэмжээнд амжилттай оролцлоо

Монгол Улсын Засгийн газраас 2019 оныг “Иргэн төвтэй төрийн үйлчилгээний жил” болгон зарласны дагуу Засгийн үйл ажиллагааг сурталчлан таниулах нээлттэй өдөрлөгийг энэ сарын 16-27-ны өдрийг дуустал Д.Сүхбаатарын талбайд зохион байгуулагдсан билээ. Эрчим хүчний яам хуваарийн дагуу 09 дүгээр сарын 26-ны өдөр нээлттэй өдөрлөгийг зохион байгууллаа.

Өдөрлөгийг нээж эрчим хүчний сайд Ц.Даваасүрэнгийн хэлсэн үгнээс:

Тэрбээр “Эрчим Хүчний Яамнаас “Төрөөс эрчим хүчний талаар баримтлах бодлогыг хэрэгжүүлэх дунд хугацааны үндэсний хөтөлбөр”/2018-2023/-ийг боловсруулж Засгийн газрын тогтоол гарган хэрэгжүүлэн ажиллаж байна. Ирэх жил бид Эрдэнэбүрэнгийн 90-100 МВт-ын  Усан цахилгаан станц /УЦС/, Чойбалсангийн Дулааны цахилгаан станц /ДЦС/-ын 50 МВт-ын өргөтгөлийн ажлуудыг эхлүүлнэ.

Өдөрлөгт эрчим хүчний салбарын харъяа төрийн өмчийн болон хувийн хэвшлийн 36 үйлдвэр, компани оролцож, Эрчим хүчний салбарт хэрэгжиж буй төслүүд болон цахилгаан халаагуур тоног төхөөрөмжийг танилцуулж, Эрчим хүчний үнэ тариф, Эрчим хүчний тусгай зөвшөөрөл эзэмшигч компаниудын үйл ажиллагаа, Цахилгаан, дулааны техникийн нөхцөл, Эрчим хүчний барилга угсралтын тусгай зөвшөөрөл, Эрчим хүчний салбарт мэргэжлийн боловсон хүчин бэлтгэх, давтан сургах, мэргэшүүлэх зэрэг цогц мэдээлэл, үйлчилгээг үзүүллээ.

“ДБЭХС” ТӨХК нь танилцуулга, брошур цахилгаан, дулааны мэдээллийн гарын авлага, ухаалаг тоолуур, хэмнэлтийн гэрэл, стендны талаарх мэдээ үйлчилгээг нийт 246 иргэдэд хүргэж хүлээн авч буй иргэдийн дийлэнх нь цахилгаан, дулааны эрчим хүчний хангамж, төлбөр, тооцоо болон үнэ тарифтай холбоотой санал, хүсэлт, ухаалаг тоолуурын талаар мэдээлэл авч санал гаргаж байсан юм.