“ДБЭХС” ТӨХК-ийн 50 МВТ-ийн өргөтгөлийн шав тавих ёслолын ажиллагаа боллоо
Түлхүүр гардуулах гэрээгээр хэрэгжих Чойбалсангийн дулааны цахилгаан станцын чадлыг 50 МВт-аар өргөтгөх төслийн ажлын зураг төсөл боловсруулах, тоног төхөөрөмж нийлүүлэх, барилга угсралтын ажлыг гүйцэтгэж ашиглалтанд хүлээлгэн өгөх төслийн нээлтийн шав тавих ёслолын ажиллагаа 2019 оны 11 дүгээр сарын 08 ны өдөр боллоо.
Шав тавих ёслолын энэхүү түүхэн үйл ажиллагаанд МУ-ын Ерөнхий сайд У.Хүрэлсүх, Эрчим хүчний сайд Ц.Даваасүрэн, УИХ-ын гишүүн Х.Болорчулуун, Дорнод аймгийн засаг дарга М.Бадамсүрэн, “TBEA” группын Дэд ерөнхийлөгч Жен Янь болон холбогдох яамны мэргэжилтнүүд, аймгийн удирдлагууд, “ДБЭХС” ТӨХК-ийн ажилтнууд оролцлоо.
1967 онд 36 МВт-ын хүчин чадалтай байгуулагдсан цахилгааны станцыг өргөтгөх талаар сүүлийн 10 гаруй жил, хэд хэдэн Засгийн газар дамжин ярьсан ч ажил хэрэг бололгүй өнөөг хүрээд байлаа. Газрын тосны олборлолт, боловсруулалт болон уул уурхайн салбарыг тогтвортой хөгжүүлэх, зүүн бүсэд томоохон бүтээн байгуулалт хийх зорилгоор цахилгаан станцыг өргөтгөн, хүчин чадлыг нь нэмэгдүүлэх ажил ийнхүү эхэлж байгааг Монгол Улсын Ерөнхий сайд У.Хүрэлсүх тэмдэглэв. Станцыг 18 сарын хугацаанд багтан өргөтгөх бөгөөд шаардагдах хөрөнгийг Хөгжлийн банкны зээлээр санхүүжүүлэх юм.
